Олимпиададағы үлкен өзгерістер: не өзгермек?
ҰОК
Болашақта қысқы Олимпиада ойындарының бағдарламасы айтарлықтай өзгеруі мүмкін. World Athletics ұйымының президенті Себастьян Коу қысқы Олимпиадаға кейбір жазғы спорт түрлерін енгізу туралы бастама көтерді.
Оның айтуынша, бұл шешім Олимпиаданың ауқымын кеңейтіп, оған көбірек елдің қатысуына мүмкіндік береді.
Қазір жазғы және қысқы Олимпиадалар арасындағы айырмашылық өте үлкен. 2024 жылы Парижде өткен жазғы Олимпиадада 329 медаль жиынтығы сарапқа салынды, оған 200-ден астам ел қатысты. Ал 2026 жылы Милан мен Кортина-д’Ампеццода өтетін қысқы Олимпиадада небәрі 116 жарыс түрі болады, қатысушы елдердің саны жүзге де жетпейді.
Себастьян Коу осы теңсіздікті азайту үшін қысқы ойындарға жазғы Олимпиададан кейбір спорт түрлерін қосуды ұсынды. Мысалы, ауа райына тәуелсіз және жабық ғимараттарда өтетін жарыстар — дзюдо, кросс (жер бедерінде жүгіру) және велокросс.
Бұған дейін Халықаралық олимпиадалық комитет (ХОК) мұндай ұсыныстарды қабылдамаған. Себебі қысқы Олимпиада тек қар мен мұзбен байланысты спорт түрлерінен тұруы керек деген ереже болған. Алайда жаңа ХОК президенті Кирсти Ковентри дәстүрлі шектеулерден бас тартуға дайын екенін айтты.
Сондықтан арнайы жұмыс тобы құрылып, бағдарламаны жаңарту мәселесі қаралып жатыр. Егер бәрі ойдағыдай болса, өзгерістер 2026 жылдан бастап енгізілуі мүмкін.
Себастьян Коу ең алдымен дзюдоны атады. Оның айтуынша, дзюдо жарыстары жабық залда өтетіндіктен, қысқы ойындарға оңай бейімделеді. Ол тіпті ақпан айында Парижде өтетін халықаралық турнирге барып, спортшылардың пікірін тыңдамақ.
Сонымен қатар ол Олимпиада бағдарламасында әлі жоқ кросс пен велокроссты қосуды да ұсынады. Бұл спорт түрлерін бір трассада өткізуге болады, яғни ұйымдастыру жағынан ыңғайлы әрі үнемді.
Коу бұл өзгеріс Африка құрлығына жаңа мүмкіндік береді дейді. Қазір Африка елдерінің қысқы Олимпиададағы қатысуы аз. Мысалы, 2022 жылы Бейжіңде өткен қысқы Олимпиадада африкалық спортшылар бірде-бір медаль ала алмады. Ал кросс жарысында Кения, Эфиопия және Уганда спортшылары әлемде үздік болып келеді.
2024 жылы Белградта өткен кросс бойынша әлем чемпионатында 27 медальдің 26-сын африкалықтар жеңіп алған.
Егер Себастьян Коу ұсынған идея жүзеге асса, қысқы Олимпиада жаңа форматта өтеді. Ол тек қар мен мұздың емес, әлем спортын біріктіретін кең алаңға айналуы мүмкін.