«Қайсар» мен «Жетісу» келер жылы Бірінші лигада ойнайды

Қазақстан Премьер-лигасының 2026 жылғы маусымы аяқталып, чемпионаттың барлық жүлдегері мен төменгі дивизионға түсетін командалар белгілі болды, деп хабарлайды Bassport.kz Informsports.kz-ке сілтеме жасап.  30-турдың қорытындысы бойынша шымкенттік «Ордабасы» Қазақстан чемпионы атанды. Шымкенттік клуб маусым бойы 68 ұпай жинап, алтын медальға қол жеткізді. 

Алматылық «Қайрат» 65 ұпаймен екінші орынға тұрақтап, күміс жүлдені иеленді. Алматы командасы чемпион атанған «Ордабасыдан» небәрі үш ұпайға қалып қойды. Үздік үштікті елордалық «Астана» түйіндеді. 54 ұпай жинаған астаналық клуб чемпионаттың қола жүлдегері атанды. 

Ал маусым қорытындысында екі команда Қазақстан Премьер-лигасындағы орнын сақтап қала алмады. Талдықорғандық «Жетісу» 27 ұпаймен 15-орынға тұрақтаса, қызылордалық «Қайсар» 25 ұпай жинап, турнир кестесінің соңғы 16-сатысында қалды. Осылайша, «Жетісу» мен «Қайсар» келесі маусымда Бірінші лигада өнер көрсетуі тиіс. 

Айта кетейік, 2026 жылғы Қазақстан Премьер-лигасына 16 команда қатысты. 30 турға созылған чемпионатта алтын, күміс және қола жүлделердің иегерлері анықталып, элиталық дивизионмен қоштасатын екі клуб белгілі болды.