Түркістан өңіріндегі жаңа серпін: Бәйдібекте мәдениет пен спорт саласына серпін беретін нысан ашылды

Жаңа мәдениет үйі мен заманауи спорт кешені – «Ауыл – ел бесігі» бағдарламасының нақты жемісі.

Түркістан облысының Бәйдібек ауданында маңызды әлеуметтік бастамалар аясында жүзеге асырылған екі жаңа нысан – мәдениет үйі мен спорт кешені — халық игілігіне пайдалануға берілді. Бұл жобалар Қазақстан Республикасының Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасын жүзеге асыру жолындағы жүйелі әрі нақты қадамдардың айғағы іспеттес. Аталған жобалар аймақтағы тұрғындардың әлеуметтік, мәдени, спорттық қажеттіліктерін қамтып қана қоймай, елдің болашағына серпін берер жаңа мүмкіндіктер көкжиегін аша түсті.

Амансайдағы мәдениет ошағы – ауылдың рухани жүрегіне айналмақ

Боралдай ауылдық округіне қарасты Амансай елді мекенінде «Ауыл – ел бесігі» мемлекеттік бағдарламасы аясында 150 орындық жаңа мәдениет үйі бой көтерді. Заманауи архитектуралық талаптарға сай салынған бұл ғимарат – ауыл тұрғындары үшін мәдени өмірдің жаңа кезеңі басталғанының нышаны. Ғимарат ішкі құрылымы мен техникалық мүмкіндіктері бойынша облыс деңгейіндегі мәдени ошақтармен теңесуге лайық.

Мәдениет үйі дыбыс, жарық, сахналық жабдықтармен толық қамтамасыз етілген. Бұл – ауыл тұрғындарының бос уақытын тиімді ұйымдастыруға және өнерге жақындасуына үлкен мүмкіндік.

Кешеннің ішкі құрылымында заманауи кітапхана да бар. Ол түрлі жас ерекшеліктеріне арналған әдебиеттермен, тарихи-танымдық еңбектермен және цифрлық ресурстармен жабдықталған. Кітапхана электронды жүйеге де бейімделіп, оқырмандарға интерактивті қызмет көрсету арқылы мәдени қызметтің жаңа деңгейіне шығуға мүмкіндік береді.

Амансайдағы мәдениет үйінің ашылуы – ауылдық елді мекендердегі мәдени инфрақұрылымды жаңғыртуға бағытталған нақты іс. Бұл жобаның жүзеге асуы, ең алдымен, ауыл тұрғындарының әлеуметтік әділеттілікке қол жеткізуіне, мәдени теңсіздіктің азаюына және сапалы қызметтерге қолжетімділіктің артуына әсер ететіні сөзсіз.

Шақпақтағы спорт кешені – бұқаралық спорттың жаңа белесі

Ал Алғабас ауылдық округіне қарасты Шақпақ елді мекенінде ашылған жаңа спорт кешені ауыл жастарының салауатты өмір салтына бет бұруына зор мүмкіндік беріп отыр. Заманауи үлгіде салынған бұл нысан 2024 жылдың мамыр айында құрылысы басталып, небары бір жыл ішінде толық аяқталып, пайдалануға берілді. Жобаны «Real Story Invest» ЖШС жүзеге асырды.  

Спорт кешені универсалды залдармен, жаттығу құрал-жабдықтарымен, киім шешетін бөлмелермен, медициналық пунктпен және әкімшілік-шаруашылық кеңселерімен толық қамтылған.

Нысанның ашылу салтанатына қатысқан Бәйдібек ауданының әкімі Ерлан Нұрмаханов ауыл тұрғындарын шын жүректен құттықтап, аталған жобалар өңірдің мәдени-спорттық әлеуетін арттыруға бағытталған кешенді жұмыстардың нәтижесі екенін атап өтті.

Мәдениет пен спорт – ауыл өмірінің тірегі

Бүгінгі таңда Түркістан облысының Бәйдібек ауданында 238 спорт нысаны жұмыс істейді. Олардың қатарында:

3 дене шынықтыру-сауықтыру кешені

1 су спорт кешені

1 жабық теннис корты

3 спорттық манеж

53 спорт залы

177 спорт алаңы бар.

Бұл көрсеткіштер аудан әкімдігінің бұқаралық спортты дамытуға бағытталған стратегиялық бағытын нақты көрсетіп отыр. Спорт инфрақұрылымын жаңғырту – ауыл жастарын теріс әрекеттерден аулақ етіп, олардың белсенді, пайдалы өмір салтын таңдауға жол ашады.

Ал мәдениет саласына келер болсақ, өңірде мәдениет үйлері, кітапханалар мен өнер мектептерінің саны жыл сайын артып келеді. Осы арқылы ауыл тұрғындарының мәдени өмірге қатысу белсенділігі де өсіп келеді. Әсіресе, жастар мен балалардың шығармашылық қабілеттерін дамытуға бағытталған үйірмелердің жұмысы кеңейіп, нәтижесінде аймақтық, облыстық және республикалық байқауларда жүлдегер атанған жас дарындар көбейіп келеді.

Ауылдағы ілгерілеу – ел болашағының кепілі

Түркістан облысында жүзеге асып жатқан мұндай жобалар – ел аймақтарының тең дамуын көздейтін ұлттық саясаттың нақты нәтижесі. Бәйдібектегі жаңа мәдениет үйі мен спорт кешені – тек ғимарат қана емес, олар – ауыл өміріне жаңа дем берген, рухани және физикалық дамуға бағытталған орталықтар. Мұндай нысандар ауыл жастарының талантын ашып, елге адал қызмет ететін ұрпақ тәрбиелеуге ықпал етеді.

Жергілікті билік органдарының, кәсіпкерлердің және қоғам өкілдерінің бірлесе әрекет етуі арқасында жүзеге асқан бұл жобалар халықтың әл-ауқатын жақсартуға бағытталған жүйелі жұмыстардың жарқын көрінісі. Мемлекет басшысы айтқандай, «халықпен етене жұмыс істеу, ел мүддесіне қызмет ету – билік жұмысының басты бағдары болуы тиіс». Түркістан облысы бұл бағытта қарқынды жұмыс жүргізіп келеді.

Осы орайда Бәйдібек ауданындағы бүгінгі оң жаңалық – тек сол елді мекендердің емес, жалпы аймақтың дамуына қосылған сүбелі үлес екені сөзсіз. Ауылдан басталған даму – елдің ертеңіне бастар нақты жол.