Ақмола облысы спорт инфрақұрылымын нығайтуда: ДШСК мен ашық спорт кешені салынып жатыр
Zakon.kz
Ақмола облысында соңғы жылдардағы ең ауқымды спорттық инфрақұрылым жобаларының бірі жүзеге асуда, деп хабарлайды Bassport.kz.
2025 жылдың соңына дейін өңірде сегіз жаңа нысан пайдалануға берілмек. Олар бір мезетте бірнеше міндетті шешуге бағытталған – кәсіби спортшыларды даярлау, ірі турнирлер өткізу және ауыл тұрғындарын бұқаралық спортқа тарту.
Жобалардың флагманы – Көкшетауда салынатын көпфункционалды спорт кешені. Ол арнайы мемлекеттік қор есебінен қаржыландырылады, бұл қор жемқорлардан тәркіленген қаражатты бюджетке қайтару арқылы толықтырылуда.
Жобаға сәйкес, заманауи спорт кластерінің құрамына 650 орындық спорттық-сахналық зал, өрмелеу қабырғасына арналған әмбебап алаң, өрт-қолданбалы спортқа арналған мұнара, бокс, күрес, ауыр атлетика, кроссфит залдары мен толық жабдықталған тир енеді.
Бұл кешен облыс орталығындағы спорт нысандарының тапшылығын жойып қана қоймай, жоғары деңгейдегі жарыстар өткізуге, ұлттық және халықаралық додаларға спортшыларды даярлауға, сондай-ақ жастарды салауатты өмір салтына баулуға мүмкіндік береді.