Жастар құрамасындағы боксшының өліміне байланысты сұрақ көп
Tengrinews
Қырғызстандағы Ыстықкөл көлінде Қазақстан U-22 құрамасының оқу-жаттығу жиыны кезінде шымкенттік жас боксшы Ибрагим Ирисматов суға батып қаза тапты. Бұл оқиға қоғамда үлкен резонанс туғызды, деп хабарлайды Bassport.kz «Red Media»-ға сілтеме жасап.
Ресми мәліметке сәйкес, жиынды Олимпиада чемпионы Бақыт Сәрсекбаевтың жетекшілігімен Қазақстан құрамасы өткізген. Алайда, қайғылы жағдайдан кейін Қазақстан бокс федерациясы мен Шымкент қаласының спорт басқармасы марқұм Ыстықкөлде «туристік сапармен» болғанын мәлімдеді.
Бұл мәлімдеме спорттық қауымдастық өкілдері мен журналист Ерзат Сергазиннің наразылығын туғызды. Себебі Ирисматовтың жиынға өз қаржысы есебінен қатысқаны, командамен бірге жаттығуға қатысқаны, яғни бейресми түрде құраманың бір бөлігі болғаны айтылды.
Журналистің айтуынша, бұл тек саяхат емес, Азия чемпионатына дайындық аясындағы ресми жаттығу жиыны болған. Сол себепті спортшының өліміне қатысты жауапкершіліктен қашу әрекеті – ақталуға келмейтін қадам.
«Неліктен ешкім жауапкершілік алмай отыр? Неліктен жаттықтырушылар мен спорт шенеуніктері үнсіз қалды? Ата-анасына қарапайым адамгершілікпен көңіл айту да жасалмады. Бұл — ар-ождан мен жауапкершілік мәселесі», — деп жазды Сергазин.
Айта кетейік, U-22 құрамасының бас бапкері — 2008 жылғы Олимпиада чемпионы Бақыт Сәрсекбаев. Қазір жұртшылық Ирисматовтың өліміне қатысты әділ әрі ашық тергеу жүргізуді талап етіп отыр.