Головкиннің есімі үш миллиардтық іс бойынша сотта аталды
РБК Спорт
Астананың ауданаралық қылмыстық сотында «BizBirgemiz Kazakhstan» қайырымдылық қорының жетекшісі Перизат Қайратқа қатысты үш миллиардтан астам теңгені жымқырды деген іс бойынша сот процесі жалғасып жатыр. Бұл туралы Bassport.kz сайты Azattyq Rýhy-на сілтеме жасап хабарлайды.
Сотта кәсіпкер, MMG Development компаниясының басшысы Мөлдір Сүйіншәлі куәлік берді. Оның айтуынша, 2021 жылы Перизат Қайрат Instagram арқылы байланысқа шығып, оны елордадағы «Шератон» қонақүйінде өткен қайырымдылық кешіне шақырған. Іс-шарада бизнес және саясат өкілдері қатысқан. Жиналған қаражат ерекше қажеттілігі бар балаларға арналған оңалту орталығын салуға бағытталады деп айтылған.
Аукцион аясында Сүйіншәлі қазақстандық танымал боксшы Геннадий Головкиннің қолғабын 10 миллион теңгеге сатып алған. Бұл сома ресми түрде оның компаниясы атынан қордың шотына аударылған.
– Біз бұл жобаны мемлекеттік маңызды іс деп қабылдадық. Ақшаны ресми түрде аудардық, еш күмән болған жоқ. Бірақ кейін орталықтың шынымен салынғаны жайлы ақпарат ала алмадым. Сол себепті тергеу басталғанда азаматтық талап арыз беріп, 10 миллион теңгемді қайтаруды сұрадым. Егер қаражат мақсатқа жұмсалса, еш қарсылығым болмас еді. Бірақ ол қаражат діттеген жеріне жетпесе, оны қайтару орынды деп есептеймін, – деді Сүйіншәлі сотта.
Айта кетейік, Геннадий Головкин қазіргі уақытта Қазақстан ҰОК президенті қызметін атқарады.